१५ ओैं नेवाः एकता दिवसका लागि देय् दबूमा छलफल

नेवाःहरुको राष्ट्रिय संगठन नेवाः देय् दबू स्वनिगः विशेष प्रदेशको पहलमा नेवाः देय् दबू केन्द्रीय समिति, प्रदेश समिति, जिल्ला समिति र उपत्यकाका पालिका समितिका नेतृत्वसंग नेवाः एकता दिवस मनाउने बारे पौष १९ शुक्रवार ब्यापक छलफल भयो ।
नेवाः देय् दबूका केन्द्रीय अध्यक्ष पवित्र बज्राचार्यको विशेष उपस्थितिमा भएको उक्त भेलामा नेवाः देय् दबू स्वनिगः विशेष प्रदेश समितिका पदाधिकारी, काठमाण्डौ, ललितपुर र भक्तपुर जिल्लाका पदाधिकारीका साथै उपत्यकका पालिका नेतृत्वहरु सहभागी भएका थिए । आउदो पुष २४ गते तोखामा हुन गइरहेको १५ औं नेवाः एकता दिवसको महत्वको बारेमा देय् दबूका अध्यक्ष बज्राचार्यले बताउनु भएको थियो । कार्यक्रममा नेवाः देय् दबू तोखाका हेराकजि डंगोलले तोखामा हुन लागेको व्यवस्थापनको बारेमा जानकारी दिनु भएको थियो । त्यसै गरी नेवाः देय् दबूका महासचिव सत्यनारायण डंगोलले तोखामा हुने नेवाः एकता दिवस र नेवाः देय् दबूको बारेमा बताउनु भएको थियो । कार्यक्रममा नेवाः देय् दबू स्वनिगः विशेष प्रदेश समितिका अध्यक्ष श्रीकृष्ण महर्जनले नेवाः एकता दिवस उत्सव र संघर्षको संयुक्त स्वरुप भएको बताउदै यसपालिको दिवसमा संविधान संशोधनको सवालमा नेवाःहरुको साझा विचार सार्वजनिक गर्ने कार्यक्रम रहेको बताउनु भएको थियो । नेवाः देय् दबूको संयोजनमा नेवाः खलः पुचः लगायत थीथी संघ संस्थाको संयुक्त आयोजनामा आउदो पुष २४ गते पोहेलाथ्व नवःमि बुधवारको दिनमा तोखामा १५ औं नेवाः एकता दिवस मनाउन लागेको हो ।