दिवंगत बरिष्ठ इन्जीनियर राजदास श्रेष्ठको आत्मकथा “सक्वका राजदास” पुस्तक गत शुक्रबार एक समारोह गरी सार्वजनिक गरेको छ ।
पत्रकार समाज नेपालको आयोजनामा भएको उक्त आत्मकथा “सक्वका राजदास” पुस्तकको सार्वजनिकीकरण गर्दै नेपाल मजदुर किसान पार्टीका अध्यक्ष नारायणमान विजुक्छे (रोहित)ले समाजवादी साहित्यको निरन्तर अध्ययनले मात्र देश र जनताको सेवा हुने बताउनु भयो ।
समारोहमा नेमकिपा अध्यक्ष विजुक्छेले देशको साँस्कृतिकस्तर माथि उकास्न साहित्यको भूमिका हुने बताउँदै स्व. राजदास श्रेष्ठको आत्मकथाबाट रुसी जनताको सामाजिक, आर्थिक, राजनीतिक एवम् सांस्कृतिक स्तरबारे स्पष्ट भएको बताउनुभयो ।
मानिसलाई एक्लो भएपछि विभिन्न कुरा खेल्ने भएकाले त्यसबाट बच्न संगठनको आवश्यकता रहेको विजुक्छेको भनाइ रहेको छ । उहाँले जो व्यक्तिले जसको किताब पढ्छ, त्यसको प्रभाव पर्ने भएकोले सोभियत रुसमा भएका विभिन्न व्यक्तित्वहरुको साहित्यबारे अध्ययन गर्नुपर्नेमा जोड दिनुभयो । देशका बौद्धिक व्यक्तित्वहरुलाई प्रगति गर्न सरकारले कुनै स्थान नदिएको स्व. राजदासको अकल्पनीय घटनाबाट स्पष्ट भएको उहाँको ठहर छ ।
कार्यक्रममा मित्रकुञ्ज नेपालका सचिव इन्जीनियर एवम् लेखक रामविन्दु श्रेष्ठले स्व. राजदास श्रेष्ठका आत्मकथा “सक्वका राजदास” पुस्तक बारे समीक्षा गर्दै उहाँ अन्तरराष्ट्रिय विचार अवलम्बन भएको बताउनुभयो ।
स्व. राजदास श्रेष्ठले नेपालमा चुनढुंगाबाट सिटामोल र श्रृंगारका सामान बनाउन सक्नेतर सरकारलेभारतलाई सस्तो मूल्यमा बेचिरहेको बरोबर जानकारी दिने गरेकोजनकवि एवम् नेपाल भाषा साहित्य तःमुँज्याका सल्लाहकार चन्द्र बहादुर उलकले बताउनुहुन्छ ।
स्व राजदास श्रेष्ठ देशभक्ती, जातीय स्वाभिमानी, वैचारिक आस्थामा तत्पर र माक्र्सवादी दृष्टिकोणबाट प्रभावित व्यक्ति भएको उलकको भनाइ रहेको छ ।
यस्तै, कार्यक्रममा स्रस्ता समाज नेपालका अध्यक्ष एवम् भक्तपुर मासिक पत्रिकाका सम्पादक लक्ष्मणराज जोशीले स्व. राजदास श्रेष्ठ विज्ञ व्यक्ति भएर पनि सोझो भएकै कारण विचौलिया, ठग र जाली फटाहाहरुले फसाएको बताउनुभयो । पुस्तकको समीक्षा गर्दै उहाँले वैज्ञानिक, इन्जीनियर, प्राविधिक र साहित्यकारको रुपमा परिचित स्व. राजदास श्रेष्ठलाई मूर्खहरुको सरकारले चिन्न नसकेको औंल्याउनुभयो ।
कार्यक्रममा जनप्रतिनिधि एवम् लेखक योगेन्द्रमान विजुक्छेले लोभीपापी र स्वार्थ समाजप्रति देखिएको वितृष्णाले स्व. राजदास श्रेष्ठको अकल्पनीय क्षति भएको बताउनुभयो । राजनीतिक व्यक्तित्व बन्नका लागि साहित्यिक चेतना आवश्यक भएको बताउँदै उहाँले साहित्यकारहरु अरुको दुःखसँग घुलमिल हुनुपर्नेमा जोड दिनुभयो ।
आयोजक समितिका अध्यक्ष अनुराधा थापामगरको सभापतित्वमा भएको उक्त कार्यक्रममा पुस्तकको खण्ड १ को “जीवनयात्रा”का विषयमा सुरेश परियारले, खण्ड २ को “त्यो रेलयात्रा”बारे सुशिला कर्माचार्यले खण्ड ३ को “कला, साहित्य र राजनीति” विषयमा उद्धव सुजखुले र खण्ड ४ को “नेपाली प्रकृतिमा हेलिँदा”का विषयमा रजनी जोशीले परिचर्चा गरेका थिए ।
प्रथम संस्करणका रुपमा प्रकाशित ३ सय पृष्ठको उक्त पुस्तकको मूल्य ३ सय ५० रुपैयाँ निर्धारण गरेको छ भने आत्मकथा “सक्वका राजदास” पुस्तक सार्वजनिकीकरण कार्यक्रममा प्रकाश थुसाले पनि बोल्नुभएको थियो ।
