काठमाडौं । अमेरिकाले ७ जना नेपालीहरुलाई यौनदुराचार लगायतका आपराधिक क्रियाकलापमा संलग्न भएको अभियोगमा दोषी ठहर गरी नेपाल फर्काइदिएको छ । अमेरिकामा डोनाल्ड ट्रम्पको कार्यकाल सुरु भएपछि जुलाई महिनासम्मको अवधिमा ती सात नेपाली डिपोर्ट भएका हुन् । उनीहरु २८ देखि ३९ वर्ष उमेर समूहका छन् ।
अमेरिकामा यौन दुराचार र शारीरिक दुव्र्यवहार, डकैती, हतियारको प्रयोग गरी आक्रमण, नाबालिगलाई अश्लील उद्देश्यका लागि च्याटमार्फत प्रलोभन, मादक पदार्थ सेवन गरेर गाडी चलाएको लगायतका अभियोगमा ती नेपालीहरुलाई नेपाल डिपोर्ट गरिएको हो । ती नेपालीहरुलाई न्युयोर्कको जोन अफ केनेडी विमानस्थल, नेवार्क अन्तर्राष्ट्रिय विमानस्थल, लोगन अन्तर्राष्ट्रिय विमानस्थल, भर्जिनिया, एरिजोना र टेक्सासबाट डिपोर्ट गरिएको छ ।
१५ जुलाईमा यौन आक्रमण र शारीरिक दुव्र्यवहारको आरोपमा ३९ वर्षका एक नेपालीलाई न्युयोर्कको जोन अफ केनेडी विमानस्थलबाट नेपाल फर्काइएको छ । उनलाई गत अप्रिल २४ मा अमेरिकाको अध्यागमन अदालतले देशनिकालाको आदेश दिएको थियो ।
गत १७ जनवरीमा मेरिल्याण्ड बस्दै आएका ३६ वर्षीय एक नेपालीलाई अदालतले देश निकालाको आदेश दिएको थियो । उनलाई नेवार्क अन्तर्राष्ट्रिय विमानस्थल हुँदै मार्च ६ मा देशनिकाला गरिएको छ । यसैगरी डकैतीको संलग्न अर्का २८ वर्षीय नेपालीलाई गत जुन १० मा एरिजोनाबाट नेपाल फर्काइएको छ ।
यसैगरी, २९ अप्रिलमा हतियारको प्रयोग गरी आक्रमणमा दोषी ठहर भएका ३४ वर्षीय नेपालीलाई लोगन अन्तर्राष्ट्रिय विमानस्थलबाट देश निकाला गरिएको छ भने टेक्सासमा बस्दै आएका ३० वर्षीय नेपाली पुरुष नाबालिगलाई अश्लील च्याट गरेको आरोपमा देश निकालामा परेका छन् ।
सन् २०२४ को डिसेम्बर ९ मा अपराधमा दोषी ठहर भएका उनी ३ जुनमा भर्जिनियाबाट नेपाल डिपोर्ट भएका छन् । यसैगरी मेरिल्याण्ड बस्दै आएका अर्का ३५ वर्षका नेपाली पुरुष पनि त्यस्तै अभियोगमा दोषी ठहर भई जुन १० मा एरिजोनाबाट डिपोर्ट भएका छन् । अर्का ३७ वर्षीय नेपाली मादक पदार्थ सेवन गरेर गाडी चलाएको अभियोगमा टेक्सासबाट कतार हुँदै डिपोर्ट भएका छन् । उनी सन् २०११ को मार्च २९ मा दोषी ठहर भएका थिए भने अध्यागमन अदालतले सन् २०१७ को जुलाई १९ मा डिपोर्टको आदेश दिएको थियो ।
