काठमाडौं संसारमा चर्चित नाममध्ये एक नाम हो एलन मस्क । अमेरिकी राष्ट्रपति डोनाल्ड ट्रम्पको सल्लाहकार पदबाट राजीनामा दिएका अर्बपति एलन मस्कले नयाँ राजनीतिक दल स्थापनाको घोषणा गरेका छन् । मस्कले “अमेरिका पार्टी” दल स्थापना गरेको घोषणा गरेका हुन् । एलन मस्कले यो जानकारी सोसल मिडिया प्लेटफर्म एक्स मार्फत् दिएका छन् ।
एलन मस्कको नयाँ दल “अमेरिका पार्टी” औपचारिक रूपमा दर्ता भइसकेको छ कि छैन भन्ने जानकारी मस्कले दिएका छैनन् । पार्टीको स्वरुप र पार्टीको नेतृत्वबारे पनि स्पष्ट भइसकेको छैन । अमेरिकाको फेडलर इलेक्सन कमिसनले पनि शनिबारसम्म नयाँ दल दर्ताबारे जानकारी नदिएको बीबीसीले जनाएको छ ।
यद्यपि एलन मस्कले आफ्नो नयाँ पार्टी“अमेरिका पार्टी”ले अमेरिकाको द्विपक्षीय राजनीतिक दल रिपब्लिकन र डेमोक्रेटिकलाई चुनौती दिने बताएका छन् ।
सन् २०२४ को अमेरिकी निर्वाचनको बेला एलन मस्क डोनाल्ड ट्रम्पको प्रमुख समर्थक थिए । मस्कले चुनावका लागि ट्रम्पलाई २५ करोड डलर चन्दा दिएको विषयले चर्चा पाएको थियो ।
रिपब्लिकन पार्टीका उम्मेदवार ट्रम्प राष्ट्रपति निर्वाचित भएपछि मस्क सरकारी खर्च कटौती सम्बन्धी कार्यदक्षता विभाग (डीओजीई) को प्रमुख पदमा नियुक्त भएका थिए । पछि ट्रम्पसँगको आन्तरिक विवादका कारण मस्कले सो पद त्यागेका थिए । पद त्यागलगत्तै उनले नयाँ राजनीतिक दल खोल्ने सम्भावनाको कुरा गरेका थिए ।
अमेरिकाको स्वतन्त्रता दिवस (४ जुलाई)को अवसरमा मस्कले एक्स अकाउन्टमा एक पोल राखेका थिए । त्यहाँ उनले लेखेका थिए– के तपाईं दुई पार्टी सिस्टमबाट स्वतन्त्रता चाहनुहुन्छ ? के हामीले नयाँ पार्टी बनाउनुपर्छ ?
यी प्रश्नमा मत व्यक्त गर्न दिइएका दुईवटा अप्सनहरुमध्ये ६५.४ प्रतिशतले नयाँ पार्टी बनाउनुपर्छ भन्ने पक्षमा मत व्यक्त गरेका थिए । ३४.६ प्रतिशतले पर्दैन भन्ने पक्षमा मत दिएका थिए ।
सो पोलको नतिजापछि मस्कले एक्समा लेखेका छन्– “तपाईंहरु ६६ प्रतिशतले नयाँ राजनीतिक पार्टी चाहनुहुन्छ र अब यो तपाईंले प्राप्त गर्नुहुनेछ । जब अमेरिकालाई बर्बाद गर्ने र भ्रष्टाचारको कुरा आउँछ तब अमेरिकाका दुवै पार्टी (रिपब्लिकन र डेमोक्रेटिक) उस्तै हुन आउँछन् । अब देशले दुई पार्टी सिस्टमबाट स्वतन्त्रता पाउने छ ।”
