काठमाडौं÷रसुवाको भोटेकोशीमा आएको बाढीमा परी मर्नेको संख्या ८ पुगेको गृह मन्त्रालयका प्रवक्ता एवं सहसचिव रामचन्द्र तिवारीले जानकारी दिएका छन् ।
गृह मन्त्रालयका प्रवक्ता एवं सहसचिव तिवारीले बुधबार बिहान अहिलेसम्म बाढीमा परी मर्नेहरुको संख्या ८ पुगेको र २० जना हराइरहेको जानकारी दिएका हुन् ।
तिवारी भन्छन्, “अप्रत्यासित रुपमा बाढी आयो । त्यसले जनधनको ठूलो क्षति भएको छ । २० जना व्यक्तिहरु हराइराख्नुभएको छ । हिजो बेलुकासम्ममा ८ जना व्यक्तिहरुको शव प्राप्त भएको छ । अरु व्यक्तिहरुको खोजी कार्य जारी छ । मितेरी पुल बगाएको अवस्था छ । स्याफ्रुगढीदेखि रसुवागढीको टिमुरेसम्म जान सडक अवरुद्ध भएको अवस्था छ । केही जलविद्यूत आयोजनामा क्षति पुगेको, भन्सार यार्डमा क्षति पुगेको छ । २३÷२४ वटा मालवहाक कन्टेनरहरु, ३५ वटाजति इभी गाडीहरु र अरु केही ट्रकहरु पनि बाढीले बगाएको भन्ने जानकारी प्राप्त भएको छ ।”
साथै, सो क्षेत्रमा बाढी आउँदैछ भन्ने पूर्व सूचना नभएको अवस्थामा बाढी आएको उनले बताए । उनले वर्षा भएर भन्दा पनि तिब्बततिर हिमताल फुटेर बाढी आएको हुनसक्ने प्रारम्भिक अनुमान रहेको बताए । प्रमाणित भने नभइसकेको, के भएर बाढी आएको हो भन्ने प्रमाणित कुरा अझैं आइनसकेको उनले बताए ।
सहसचिव तिवारीले बाढीपश्चात खोजी, उद्धार र राहतको काम भइरहेको बताए । अहिले त्यहाँ स्थानीय प्रशासनले काम गरिरहेको उनले बताए । उद्धारको लागि हेलिकोप्टर, थप जनशक्ति काठमाडौंबाट गएको गृह मन्त्रालयका प्रवक्ता एवं सहसचिव रामचन्द्र तिवारीले जानकारी दिएका छन् ।
